Amus bidu muraglias de penas
e a fogu, sa zente marcare.
Amus bidu berveghes mudare
in ienas de vele pienas.

Pienadu an de samben su mare
an brujadu sas terras amenas
e de atomicas, vanas cadenas,
amus bidu aeras armare.

Putzolente, pro cantu isciaista,
chi s'acontzat cun cantos de isciau,
carre ona, che cando est ispau,
si la gosit e s'iscartu lu pista'.

A vigliacos a filos de bau
cando linghen pro enner in vista,
e pro nd'aer sa domo provista,
in atiles si arman de trau.

Amus bidu giudeos e scimanos,
cun piscamos, bonzos, sunnistas,
ortodossos, indù chin buddistas,
elevare sos ricos marranos.

Amus bidu de iscentzia conchistas
chi signalan isvistas mundanas,
ma amus bidu de paghes umanas,
sol’abbojos e memulas tristas.

Cantilenas de corvu a fuinas
chi si tinghen de ajudos e penas,
isfrutende anzenas granghenas
pro chi lastima istoddat istrinas.

Iscunfessan sos malefadados
ca disizan incunzas anzenas,
ma sos ricos sun comunigados
cun sas mindigas pulpas terrenas.

A famidos de rassas cussorzas
giughen pane cun atentzione,
ca mariani lis creschet partolzas
pro frunire puddame a matzone.

Tale grodde, pro chi furisteri,
dae sos campos si sutzat sos ozos
e pro fagher ispumos e ispozos,
bastat narrer: "Compà, port'abberi!"

Maresciallu chi prenat iscarzu
cun s'imbarzu chi l'atit su ladru
e su sindigu l'at decoradu
cun s'incunza de su prim'imbarzu.

Cussizeri, assessore de pica
chi sa fide la oltan in vile,
ana villa, alzola e cuile
e astrau non timet ne sica.

Giornalista cun sa cinepresa
pro mudare notiscia in romanzu,
dignidade si endet pro alanzu
cun virtude mudada in bascesa.

Pro giambare sa legge a su capu,
a zuighe li naran iseta.
De sa cuba s'abberin s'isceta
e a nois a mantenner su tapu.

frealzu 2009