Ammentu a sa centenaria “Uannanzela Tiana”
di Giuseppe Concas

Pagu prus de chentu metros de distanzia
primma fit naschida Zuannanghela Tiana
da poi cun Rosa giogaiana
a pizzinnas de sa primma infanzia.

Famiglia de nobile importanzia
a su tempus onzi bene teniana
e a su bisonzu nde daiana,
cun piaghere e vera fratellanzia.

Sa zente meda bene la cheriana
utiles a donzi circostanzia
Mocci, su maridu, in abbundanzia
cun Angela favores faghiana

Ischian perdonare una mancanzia
chi dae Roma ispesso ch’eniana
Vittorio cun Enrico giogaiana
cun sa cultura de sa nostra usanzia.

A piur de chentu e battor’annos
Zuannanghela bia fid’ancora
oe es partid’a s’eterna dimora
ue riposan minores e mannos.

A fizzos e nepodes lis faghimos
tantas sentidas astrintas de manos
e dae tottu sos bostros paesanos
ammentos de mama ostra tott’unidos.