Ammentos
di Metodio Dalu

Si un'istante reposo in su divanu
mi torran a sa mente mille cosas,
sono ammentos de sos annos rosas
de unu tempus lontanu, lontanu:

m'ido pizzinnu de oto o noe annos
currende isculzu a brincos che murone,
chin su coro cuntentu che puzone,
chin s'animu serenu e senza afannos.

Torran in mente totu sos ispannos
godidos in sa durche zoventude
cando sa vida non fit una pelea.

Como ses cambiada vida mea,
mancat sa forza, perdes sa durcura,
ca sono cuminzados sos malannos

(Torpè)