Amigos

di Benito Saba (2006)

Ómine mannu ammentas pitzinnia
e sos fedales in sintzeridade
aggradessidos, chene malidade,
tírria, chibberesa o ingannia...

Menzus posca as connottu in bajania
sa sorre 'e bonucoro 'e s'amistade:
si verdadera, creschet cun s'edade,
non si che colat in àtera via.

Ma si falat da' chelu su ruinzu
a su bisonzu faltat sa resposta,
no agatas s'amigu fitïanu

chi in domo tua fit sero e manzanu...
E non bi crees, ma a su tira e tosta
non nde trazas perunu beru allinzu!

Benito Saba

Questa poesia ha conseguito la Menzione d'onore alla XII Ediz. del 'PREMIO DI LETTERATURA IN LINGUA SARDA SEUNIS' - THIESI - 2006