Caru Zuseppe, caldu unu saludu
Da Iscanu ti cherìa mandare
Po poder de poesia faeddare
Si calchi musa m’enit in azzudu

però non bi creo a su c’as nadu
chi male est andande su su motore
ca naran, ogni bravu rimadore
a ogni intemperia est attalzadu.

po cussu narzo Peppe non ti arrendes
ca su poeta mai no est istraccu
tue ancora portas pane in saccu
e bene s’elicona la cumprendes.

Dae a sa rima, colpu ‘e Muzzigone
lubrifica pistones e biellas
e cun quartinas e ottavas bellas
gagliardu sighi sa competizione

ca giros meda ancora b’at de rodas
in su sardu autodromo ‘e girare
poeticas curvas de inghiriare
po fiorire modellos e modas

po fagher undighinas de talentu
modas tentas a maglia e a trinetta
chi in sa pista de ogni poeta
passan, e fuin veloces che su entu

ca si mancamos nois da sa vetrina
de su chi naran su sardu parnasu
est, una pastasciutta sena casu
est pane fattu cun paga farina

po cussu sighimos canta canta
gia chi mos at dadu deus su donu
cun calchi tazzighedda ‘e inu onu
mo la cantamos finas a noranta

ca deo in custas cosas tenzo fide
e una die ‘enzo a ti chilcare
po ti narrer chi chelzo agguantare
finas a cantu fruttu dat sa ide

posca cando a sa vida dao sa ghia
fatto domanda chi s’ultima culla
siet fatta a forma de un’ampulla
prena de libereddos de poesia

e cando tue puru bezzu e arresu
in cuddu mundu mi cheres chilcare
bastat appena in giru ‘e domandare
chilco su fizzu e Baccu… s’Iscanesu.

settembre 2008