Aggiu zuccaddu
di Gigi Noce

Soggu giunta’ acciappatti ma no v’eri
Aggiu zuccaddu(1) … una voltha… dui volthi
nisciunu in casa
…e già lu sori in pressa era carendi.

Aggiu aisittaddu i’ l’oru di la gianna(2)
poi v’aggiu visthi a tutt’e tre vinendi
dui figliori alti e un babbu un’aizu canu
v’aggiu basgiaddi intrendi…

No m’abeddi siriadda(3) mancu un fenu(4)
e sedd’intraddi in casa
ciaccutendi(5)

Aggiu pinsaddu chi cun tant’amori
l’abemmu fatti be’ chisthi figliori-.
…z’e faraddu lu sori.

Aggiu zuccaddu, pianu, un’althra voltha
e tu, abrendi la gianna,
ài figgiuraddu la carrera biodda
-Ah, si v’acciappu!…-

T’aggiu basgiaddu accua(6) e tu sei transiddu(7)
intrendi ài dittu - deb’assè lu ventu-
e ài tancaddu la gianna i’ l’apusentu(8)

… abà soggu in andéra…tra l’isthelli.

 

(1) bussato
(2) sulla soglia della porta
(3) non vi siete accorti di me
(4) minimamente; lett.pagliuzza di fieno
(5) scherzando
(6) di nascosto
(7) sei rimasto interdetto
(8) casa; lett. camera