Poesia in lingua sarda
Àfrica
In sos sónnios de ómines chentza làcanas
apo ’idu sos colores arestes
de una fantasia africana.
Sa terra antiga ’e King
pesat unu cantu ’e libbertade;
moet su ballu sa ’oghe liera
de un'ischiavu ’e Pretória.
Dae tempus meda
cadenas de sàmbene e dolore
iscurren in sas abbas lúghidas
de su Niger e de su Zaire;
in sa foresta ’e Moanda
su tamburu úrulat atítidos
e cramat a númene sos fizos in disterru.
S’Àfrica pesat unu cantu ’e libbertade
pro sos sinnos de s'identidade apeutada
e ispramminada che sos suos tam tam:
che una crabola ferida
iscurrizat in sos campos de cotone
e in sas minieras ricas
de sos meres de Cape Town.
Su colore ’e sa morte
pessighit sa candhidesa ’e s'ànima tua.
In sos sónnios de ómines líbberos
apo ’idu sos colores arestes
de una fantasia africana;
in su coro meu píghidu ’e tristura
m'irgonzo d'esser biancu.
Nota
Ingrazeu in versos a Nelson Mandela e ammentu de Jerry Essan Masslo, assassinadu a Villa Literno.