Aes chi altu volades
lizeras in chelu serenu
d’affanos che mie pienu
nazzemi si n’incontrades ?

Vois ch’olades lizzeras

E giros meda facchides
si a issa la vidides
novas li dade sinzeras
de issa dademi veras
nazzemi it’ est faghenne
si est a mie pensenne
torrademi samben’in venas
Illeppiade sas penas
aes ch’in altu volades

Aes ispera mi dade

Vois chi girades tantu
supra su celeste mantu
si vois a issa incontrade
chi so suffrinne li nade
ispinas appo in su coro
sa rosa a fozzas d’oro
si est de me olvidada
torrade chi s’imbasciada
lizeras in chelu serenu

Mirade dae s’ aera

Altura vaddes e vias
picade sos penas mias
non’aggiunghedas attera
de sa rosa verdadera
mi punghene sas suas ispinas
prenu e piantu e de vrinas
sambenat su coro meu
ca non b’at in munnu intreu
d’affanos che mie pienu

Vois aves ch’intennides

Custu cantu dolorante
vois ch’in d’inu istante
vazzes e lestras venides
a cussu coro aperides
sinzeras venas d’amore
chi lenan su meu dolore
mi dene isettu e ispera
profumos de issa in s’aera
nazzemi si n’incontrades

Lampadas, 2014