Abbandonu
de Pasquale Dessanay

Invanu est chi ti cherzas tribulare
pensende de commover custu coro;
si ti appo amadu, como non t'adoro,
pro me pius nemmancu a bi pensare.

Non de faco perunu pensamentu,
non de sento in su coro piedade,
ca non ses digna de tenner cuntentu
si non sa pius indigna crudeltade;
sos ahis chi ti servin de appentu
no los curat su coro indifferente,
innantis dae tottus ausente
che ti cherrer sos dolos abblandare.

Allargu dae mene sos carignos
avvelenados de su fagher tou,
mancari tue nde ponzas de impignos
no lu balanzas su coro de nou;
crédemi puru chi non sunu dignos
sos ojos de ti dare una mirada,
rèstadi puru afflitta e attristada
ne alzes pius oju a mi mirare.

Non cherzo pius burdellos in s'ereu
bastantemente bi nd'às causadu,
como cherzo chi b'intret su recreu
in su coro chi fit attribuladu!
Pius no l'incontras su favore meu
ca non ses digna de tenner favores,
e in cambiu de tottu sos amores
odiu eternu ti cherzo mustrare.

Est beru chi de coro t'amaia
cando cara de giusta mi mustrâs,
in sos desizos ti cuntentaia
ma in abusu leadu ti l'às,
como chi t'appo bene connoschia
de ti trattare non mi nde dat coro,
ca chin tegus a mie disonoro,
cosa chi no la cherzo cumproare.

Atter de te pius sentimentale
det lograre s'amore pius sinzeru,
tenetilu pro legge naturale,
non de tenzas de me pius isperu;
pro chi ti bida in istadu mortale
non ti consolan sas lusingas mias.
Sola sola chin duras angustias
priva de me pro semper des istare.

Como ti lean sos attaccos fortes
mentre prima fis sempre non curante,
como non tenes chie ti cunfortet
e in prima nd'aias abbastante;
como non ti secundat pius sa sorte,
mentras prima cumpagna la tenias,
gai perdes sa frisca pizzinnia,
senza perunu cunfortu lograre.

Cando às sa domo tua abbandonada,
credias chi s'amore fit eternu;
pro cussu est chi benias affannada
fidende ind' unu gosu sempiternu,
e ti ses de me solu interessada
ponende fattu a sos capriccios mios,
però narrer cumbenit como «adios»
a tottu sos delirios de s'amare!...

T'offendias ca oro no às tentu...
mancari pari esserat su valore,
e àppidu nd'às tale attrivimentu
de narrer chi fit unu disonore;
ma però, in su propriu momentu
pro chi papiru esseret l'às ispesu...
e i su decoro tue l'às offesu
pensende solamente a ti mudare.

De pustis ti àt intradu gelosia
e maltrattabas un'àtteru oggettu,
e andabas continu addoloria...
timende de ti perder tantu affettu.
In tale modu tottu tue perdias!
Perdias vantu, perdias onore,
perdias de s'amante cuddu amore
chi costante cheriat cunservare!

Pro finis, cuddu oggettu maltrattadu
dae sa limba tua serpentina,
intro 'e su coro si m'est inserradu
de te sola formende sa ruina.
Como mustras su coro piagadu
ma ti servit invanu su lamentu,
de su suffrire tou so cuntentu,
ne paràula spendo a t’allegrare.

Invanu est chi ti cherzas tribulare.