A unu poete amigu
de Elettra Vidili

Fus pastoreddu de bisos pienu,
naschidu in bratzos de sa poesia
chi donu t’at fatu ’e sa melodia
faghindedi connoscher in Sardigna
e cun s’iscritu tou ses s’insigna,
pro chi su sardu non l’est alienu.

Naschidu ses suta una bona istella
tantu ch’at avveradu onzi disizu,
fintzas a cantu bidu as unu lizu
e tando cambiada t’est sa vida
passada chentza perdere un’essida,
e de su coro t’est sa sentinella.

Onzi poete iscritu at de s’amore
e mancu Tue l’as lassadu a banda
tantu chi ti ses fatu sa dimanda:
ite m’at fatu meritare a Tie
chi m’iscaldias in notes de nie?
Amenta chi non fus solu pastore!

Omine dechidu e de cumpagnia,
as cantadu in sas festas paesanas
intonaias otavas brullanas,
passende poi a su duru duru
pro sos nebodes tuos de siguru,
fininde sa serada in anninnia.

Iscries de calesisiat cosa,
da’ sos pastores ch’ istan in campagna,
a sa vida chi fut una cuccagna
ma chi oe non tenet prus valore
e at perdidu puru su colore,
pro diventare prus che neulosa.

Su modu ch’as de iscrier apo apresu
e nde amiro sa rima universale
chi non si frimat a su personale
ma toccat temas pro su mundu totu,
e non morigas intro de su botu
ca est ora ‘e cambiare, as cumpresu.

Iscusa tantu si mi so’ permissa,
s’altesa certu no est sa matessi
ma in sestinas mi bi provo nessi
a onorare cust’omine ‘e judu
chi non mi neghet mai su saludu,
manteninde da’ como sa promissa.


Recensione della Giuria:
Con questa poesia l'autrice esprime parole di stima e ammirazione per un suo amico poeta che, grazie al suo talento, ha raggiunto un buon livello di notorietà.
La poesia è chiaramente composta sull'onda di sincera ispirazione ed è permeata da un'aura di buoni sentimenti e di delicato lirismo.

Terzo Premio Concorso Campidanu (Selargius) 14/4/2015.