A sa fiza ch'hat dassadu sa familia
de
Antonio Brundu

Ti ses, chene sas alas, in s’aera
Pesada, isorvendet’ in su nudda,
E perdida ti ses, chene lumera,
In furriadas de carchi baudda.

Tristos sentidos, intro sa supera
Has muricadu chene sa turudda,
E ti ses iscazada che sa chera
In pazines iscritas chin sa tzudda.

Chin d’unu caddu fatu chin sa canna,
Chene gropera, teteru che brocu,
Giumpad’ has unu badu de anneu.

Turture mea, ti ses fata manna,
Ma torra sias, ninna, cussu focu,
Chi caente luchìat in s’areu.