In terzinas dantescas l’has cumposta,
una cun s’àttera a pare ligadas,
comente una cadena a maglia tosta.

Ca non si devet ligare in debbadas:
su ch”enit presu non si devet fùere
che tzertos reos peri sas istradas.

Ja chi sutzetos lu semus a rùere,
est giustu sos errores de pagare
prima ‘e nde poder atteros prodùere.

Ma totus hamos sempre ite imparàre,
comente tue giaru nadu rn’hasa,
in s’iscola e sa vida a donzi andare.

Ca in s’ischìre est chi si ponet basa,
pro dare unu consizu o unu pàrrere
o pro buscare su pane ‘e su crasa.

Cando invittadu ti pones a nàrrere,
s’ispiegas a fundu ogni cunzettu,
tando cun totus ja podes cumpàrrere.

Mira chi no est tottu s’oro nettu,
narat su dicciu da lontana edade,
c’a bortas fin’in s’oro b’hat difettu.

Si b’addurat in mesu impuridade,
pro chi de pesu lu siet pretzisu,
tando difettat in sa calidade.

O puru ‘e una Venus su sorrisu.
ti podet incantare a prima vista,
poi t’abitzas ch’est de fele intrisu,

No est chi ti nde cherza fagher lista
de tottu su chi s”idet de fingidu:
ma tantos ‘intran a ballare in pista

senz haer mancu s’invittu retzidu.
Pro cussu como pagu mi nde curo,
ca tantas in sa vida si nd’hat bidu

chi finas fattos nodidos trascuro
prite a bortas sa mente non si prèstada
cando problemas graes li procuro

e telas de importu no nde sèstada.
No mi che pighes pro cussu a sa nue
ca tando in su Parnasu si protèstada,

ca deo poeteddu so che tue,
chi si dilettat, cando cosa l’enit,
a lu ponner in versos fue fue.

Pro che passare sora ja cumbenit,
ca tantu no nde causat ispesa,
ma de incassos, pagos si nd’ottenit.

De primeggiare rio nd’hapo pretesa,
ca tenzo finas lena sa funtana,
ch’in tempos de siccagna non dat resa.

Ma non mi leo pro cussu mattana,
bastet chi bi nde sumat un’azigu
pro nde buffare, cando m’enit gana,

paris cun calchi caru e bonu amigu.

Macumere, su 12-09-2007