A netta mia
de Tonino Fancello

Oje cantan in coro sas chimeras
e custa luna lantiat’a sa fronte
artas isperas si pesan dae monte
e alluen a framma tottu sas’aeras
tue chentu puntos oje t’ind’ameras
po los pintare in s’arcu‘e s’orizonte
chin tecus tue has fattu cuss’irfida
po diventares laureada ischida.

Colat su tempus Marinedda rara
e aperis sas alas dae su nidu
po nd’ispiccare bolos de sentidu
pones saviesa in donzi prica‘e cara
s’impinnu tù oje has postu in gara
b’enit premiadu s’istudiu servidu
arrumbat gherrajola a menzus sorte
fin’a chent’annos finas’a sa morte.

E de sa vida su menzus sentore
chircalu semper’in oras d’incantu
ca su travallu coment’unu Santu
si precat semper’e prenu d’amore.
donzi mundanu bocat su suore
pattit prus forte e meda po cantu
son tribuladas sas oras de chie
hat istudiau e meda che a tie.

Pesan’in palas oras passidoras
chi nd’has ascau in carchi mementu
chin su puntillu chimas de talentu
po dar’irfogu a pazinas sonoras
a libru in manos interi sas oras
has tessiu in mente unu bon’amentu
has postu in usu sa menzus manera
e nd’has mantesu arta sa cantera.

Marina unu chentu altu elevau
chi dominat addiscros e pianuras
secadu has de s’istirpe sas cresuras
ca non b’haiat unu istudiau
a rispostas de tesi no has mancau
ca fisti pronta chin zustas misuras
jeo t’auguro travallos a piacheres
e s’amore chi chircas su chi cheres.

04/12/2014


Dedicata a mia nipote Marina Fancello per la sua laurea.