A Madre Teresa de Calcutta
de Bruno Agus

Moda


Isterrida
Che unu sognu Ti nde ses andada
E as lassadu in custu mundu intreu
Unu sensu ’e iscunfortu profundu
Madre Teresa ’ona e istimada
Tue as dadu isperantzia e recreu
A tantos poverittos de su mundu
Mama ’e sos orfanos de Calcutta
Disisperados in mesu su drama
Famidos in s’istrada istratzulados
A issos dadu as coro e manos
De Calcutta Mama ’e sos orfanos
Disisperados in mesu su drama
De sos orfanos de Calcutta Mama
In mesu su drama disisperados
Famidos in s’istrada istratzulados
A issos dadu as manos e coro
Oe iscritta a paraulas de oro
Ses pro sa caridade beneitta
A paraulas de oro oe iscritta
E beneneitta pro sa caridade
Cand’as lassadu cust’umanidade
Sunu a rios sas lagrimas faladas.

Primu fiore
Sas animas in pena addoloradas
Chi debile e famida an sa carena
A cuddos chi as fattu de guida
Dendelis assistentzias e istimas
In pena addoloradas sas animas
Chi debile e famida an sa carena

Addoloradas animas in pena
Chi an sa carena debile e famida
A cuddos chi as fattu de guida
Dendelis istima e assistentzias
Chilcadu no as cumbenientzias
Non fis chilchende famas e ne gradu
No as cumbenientzias chilcadu
Non fis fama e ne gradu chilchende
Cando T’an bidu sos oios serrende
Inie piantu an tott’a unu a unu.

Segunda retroga
Che unu sognu Ti nde ses andada
………………………………….
A rios faladas sas lagrimas sunu.

Segundu fiore
S’India intrea at piantu in comunu
Oe ti pregan comente una dea
Religione non b’at chi ti negana
Unu postu in s’insoro regnu santu
S’India intrea in comunu at piantu
Oe ti pregan comente una dea
Piantu in comunu at s’India intrea
Comente una dea oe ti pregana
Religiones non b’at chi ti negana
Unu postu in su santu regnu insoro
Ma sos orfanos chi tenias in coro
Como han bisonzu de ateras manos
Ma sos chi tenias in coro orfanos
De ateras manos bisonzu ana como
Ca priva ’e ogni ispera ana sa domo
A da chi lis as dadu sos adios.


Ultima retroga

Che unu sognu Ti nde ses andada
………………………………….
Sun faladas sas lagrimas a rios.

Ultimu fiore e Dispedida
Cun bona intentzione ricca e brios
Fundas puru sa Cungregatzione
Missionarias animas animas profundas
De Calcutta in sa terra trista e sicca
Cun bona intentzione brios ricca
Fundas puru sa Cungregatzione
Ricca e brios cun bona intentzione
Sa Cungregatzione puru fundas
Missionarias animas profundas
De Calcutta in sa triste e sicca terra
Divisu s’an su pane perra perra
Cun sa zente chi pane non teniat
Teresa cun amore agiuaiat
A zente de ogni ratza e colore
At isceltu sa via ’e su dolore
A su fiancu de sos sufferentes
Un’ideale raru ’e sos viventes
Ma non tottus sighimos cuss’imparu
De sos viventes ideale raru
Ma cuss’imparu tottu non sighimos
Ca medas egoistas preferimos
Ricchesa personale e benessere
Ma cust’imperu chi cherimus tessere
C’at a benner a fine già l’ischimos
Proite tottus torramus a pruine
E poi restat solu su misteru
Ma tesser chi cherimos cust’imperu
C’at a benner a fine già l’ischimos

Ma cust’imperu chi tesser cherimos
Già l’ischimos c’at a benner a fine
Proite tottus torramus a pruine
E poi su misteru restat solu
Ma pro tenner ’e s’anima consolu
Dare devimos ateros signales
Pabas cun prides monzas cardinales
Politicantes de tottu sas fides
Pabas cun monzas cardinales prides
De tottu sas fides e politicantes
Attores isportivos cun cantantes
Sindagos consizeris senadores
Isportivos cantantes cun attores
Sindagos isportivos consizeris
Tottu sos riccos e finantzieris
Chi sa cuscentzia l’an troppu pesante
Ca si ognunu ’e su prossimu est amante
Diventan menzus tottu sas persones
Cun su rispettu pro sas religiones
E sos dirittos tenzant tottugantos
Pro cancellare penas e piantos
E regalare a tottu unu sorrisu
E Teresa chi est in Paradisu
At a parrer in terra ancora ia
Ue b’at sufferentzia e carestia.