A Boboriccu Cambosu
di Larentu Pusceddu

Solu oe Boborì,
sa zente riconnoschet
sa fama tua immortale.

Tue l'ischias su ditzu:
non daet fama s'umiltade.
E custa virtude
l'as sutzada
dae su sinu Oroteddesu
currende pitzinneddu,
cun sos cumpanzos tuos,
in sos impredados
de Santu Juanne
de sant'Antinu
e de Molinu Betzu.

Sa fortza ti l'at dada
sa rocca antica
de su Crastijorzi
ch'est atentu pastore
de poveritas domos.

Sa dignidade l'as collida
osserbande sa povertade antica
e su cuadu dolore
de sos fortes narboneris.

E tue as assazadu
che sos massajos
de su tempus tuo,
ranchidu mele
in sa mesa male aparitzada.

(Inedita)