In s'istradita, afaca
a su jannile,
ube tenia brasili
e carchi mata e rosa
bi creschet como
unu filu 'e pigulosa
amuntada de prùere
e soledade.

Solu su sole passat,
benit e si pasat
un' apena,
in custa
petzaria trampera
in sa carrela.

No isco chie est bistadu
su primu a
si ch'andare,
a lassare sicare
s'àrbule 'e su limone.

Sos ogros no s'atatant
chircande su
ch'ant bidu
in custu boidu nidu
ismentigadu.

In origas sas boghes
intendo a una a una,
no bi nde mancat una
de su connotu meu.

Mi tremulat su coro
a s'ammentu insoro,
animas coladas
coment colat s'abba
in su chiluru.

Parent randa de lutu
in custu muru rutu
rundines
in su filu aposentadas.

1° Classificata al Concorso di Poesia “Po Peppinu Mereu”
Tonara, 12 11 2023