Sesta a punt’in mesu
di Costantino Longu

1

A tie Nina ca t’ apo in su coro
cherzo custu modellu dedicare.
A tie Nina ca t’apo in su coro
e ca t’istimo tantu e ti adoro
un’ ammentu de me cherzo lassare;
mai mi poto de te olvidare
ca ti tenz’ inserrada in pensamentu.
A tie Nina ca t’apo in su coro
e ca t’ istimo tantu e ti adoro
de me ti cherzo lassare un’ ammentu.
Ogn’ ora de sa die, ogni momentu
Nina dechida sò pensend’ in te.
A tie Nina ca t’apo in su coro
e ca t’istimo tantu e ti adoro
lassare cherzo un’ ammentu de me.
A tie Nina ca t’apo in su coro
est cust’ opera mia dedicada.
A tie Nina ca t’apo in su coro
e ca t’istimo tantu e ti adoro
un’ ammentu de me cherzo lassare,
mai mi poto de te olvidare
ca in pensamentu ti tenz’ inserrada.
Dae me ses amada ardentemente
cun s’amore pius puru e innocente.

2

Cun su pius puru e innocente amore,
istimare ti cherzo Nina mia.
Cun su pius puru e innocente amore,
deo totu su tempus benidore
devo tenner in mente a ti’ ebbia;
finas a s’ora chi sepultadu sia
bramo de t’ aer continu presente.
Cun su pius puru e innocente amore,
deo totu su tempus benidore
a ti’ ebbia devo tenner in mente,
proite chi ses tue solamente
chi mi rendes cunfortu dogni die.
Cun su pius puru e innocente amore,
deo totu su tempus benidore
devo tenner in mente ebbia a tie.
Cun su pius puru e innocente amore,
ti rendo sos affettos dae sinu.
Cun su pius puru e innocente amore,
deo totu su tempus benidore
devo tenner in mente a ti’ ebbia;
finas a s’ ora chi sepultadu sia
bramo de t’ aer presente continu.
Però ca su destinu mi est avversu,
in tristos sentimentos vivo immersu.

3

Bramo de t’ aer vicinu a dogn’ ora
ca s’ amore chi t’ apo est troppu forte.
Bramo de t’ aer vicinu a dogn’ ora,
però timinde sò, ricc’ aurora,
chi mi andet contraria sa sorte.
Rest’ obbligadu chi mi nd’ accunorte
si su destinu gai lu cumandet.
Bramo de t’ aer vicinu a dogn’ ora,
però timinde sò, ricc’ aurora,
chi sa sorte contraria mi andet.
Si cherzo chi sa pena si m’ abblandet
mi ses tue a sa vista nezessaria.
Bramo de t’ aer vicinu a dogn’ ora,
però timinde sò, ricc’ aurora,
chi mi andet sa sorte contraria.
Bramo de t’ aer vicinu a dogn’ ora
senza esser dae te lontanu mai.
Bramo de t’ aer vicinu a dogn’ ora,
però timinde sò, ricc’ aurora,
chi mi andet contaria sa sorte.
Rest’ obbligadu chi mi nd’ accunorte
si su destinu lu cumandet gai.
Crè c’ assai fidele a dogn’ istante
de ti amare proponet Costante.

4

Est tantu insuperabile s’ affettu
chi nutro a tie delicada Nina.
Est tantu insuperabile s’ affettu,
si m’ istimas comente apo s’ isettu
de su coro meu diventas reina;
ca ses belles’ angelica e divina
de ogni donu ti at dotada Deu.
Est tantu insuperabile s’ affettu,
si m’ istimas comente apo s’ isettu
reina diventas de su coro meu.
Dogni gosu, gioia e recreu,
amandemi fidele mi aumentas.
Est tantu insuperabile s’ affettu,
si m’ istimas comente apo s’ isettu
de su coro meu reina diventas.
Est tantu insuperabile s’ affettu,
chi non des esser mai in abandonu.
Est tantu insuperabile s’ affettu,
si m’ istimas comente apo s’ isettu
de su coro meu diventas reina;
ca ses belles’ angelica e divina
Deu dotada t’ at de ogni donu.
Trattu bonu e bonos sentimentos
a sa bellesa ti dan ornamentos.

5

Sos trattos pius bellos e gentiles
a sa bellesa ornamentu ti dana.
Sos trattos pius bellos e gentiles
essende in sos annos giovaniles
ti faghen de sas bellas capitana;
pro cussu a mie in sa vida mundana
sos modos tuos tantu mi piaghen.
Sos trattos pius bellos e gentiles
essende in sos annos giovaniles
capitana de sas bellas ti faghen.
Cun reson’ est chi medas si nd’ invaghen
ca ses sa menzus de sas verginellas.
Sos trattos pius bellos e gentiles
essende in sos annos giovaniles
capitana ti faghen de sas bellas.
Sos trattos pius bellos e gentiles
a sos ojos ana fattu incantu.
Sos trattos pius bellos e gentiles
essende in sos annos govaniles
ti faghen de sas bellas capitana;
pro cussu a mie in sa vida mundana
sos modos tuos mi piaghen tantu.
Continu cu fervore santu t’ amo
e delirante in sos sognos ti giamo.

6

Ti giamo ca pius bella e amorosa
ti presentas in sos sognos dorados.
Ti giamo ca pius bella e amorosa
ses in sos sognos. De te Nina ermosa
sun sos sentidos mios occupados;
sos modos tuos tantu imbidiados
sun de grazia celeste abbellidos.
Ti giamo ca pius bella e amorosa
ses in sos sognos. De te Nina ermosa
sun occupados sos mios sentidos.
Cando penso in sos trattos tuos dechidos,
sos ojos forman lagrimas a rios.
Ti giamo ca pius bella e amorosa
ses in sos sognos. De te Nina ermosa
sun occupados sos sentidos mios.
Ti giamo ca pius bella e amorosa
s’ immagine tua in sos sognos este.
Ti giamo ca pius bella e amorosa
ses in sos sognos. De te Nina ermosa
sun sos sentidos mios occupados.
Sos modos tuos tantu imbidiados
sun abbellidos de grazia celeste.
Faghe tue chi reste currispostu
dae te, chi ogn’ isettu apo ripostu.

7

In te ripostu apo s’ isperanzia,
si non m’ istimas tue, ite fatto?
In te ripostu apo s’ isperanzia,
si non mi currispondes cun costanzia
vivo in tristura e dogni pena pato.
In tanta solitudine mi agato
finas chi a s’ idea non bi arrivo.
In te ripostu apo s’ isperanzia,
si non mi currispondes cun costanzia
pato ogni pena e in tristura vivo.
perdona s’ ides chi troppu m’ attrivo,
iscas chi t’ amo fora de misura.
In te ripostu apo s’ isperanzia,
si non mi currispondes cun costanzia
pato ogni pena e vivo in tristura.
In te ripostu apo s’ isperanzia
e ti adoro che divina Dea.
In te ripostu apo s’ isperanzia,
si non mi currispondes cun costanzia
vivo in tristura e dogni pena pato:
in tanta solitudine mi agato
finas chi non b’ arrivo a s’ idea.
Recrea tue cust’ anima affranta
chi pro t’ amare suffrit pena tanta.

8

Vivo cun penas de continu afflittu
ca cun disagios ti sò adorende.
Vivo cun penas de continu afflittu,
si cust’ affettu meu at su meritu
felicidade e delizia mi rende;
de custu coro su lamentu intende
si nd’ as de un’ amante piedade.
Vivo cun penas de continu afflittu,
si cust’ affettu meu at su meritu
delizia rendemi e felicidade.
Ispero chi sa tua bonidade
non mi lasset de goi cun mestizia.
Vivo cun penas de continu afflittu,
si cust’ affettu meu at su meritu
felicidade rendemi e delizia.
Vivo cun penas de continu afflittu,
senza te non nde prò gosu perunu.
Vivo cun penas de continu afflitu,
si cust’ affettu meu at su meritu
felicidade e delizia mi rende;
de custu coro su lamentu intende
si piedade nd’ as de amant’ unu.
Si bastante non sunu custas rimas
ti rendo menzus proa si m’ istimas.

9

Finis, custu cantu apo formadu
pro ti narrer chi t’ apo affettu veru.
Finis, custu cantu apo formadu,
si dae te non benzo riamadu
mi dasa colpu crudele e fieru;
non la lasses de goi in disisperu
dae sas penas cust’ anima invasa.
Finis, custu cantu apo formadu,
si dae te non benzo riamadu
colpu fieru e crudele mi dasa.
Si ver’ affettu tue a mie m’ asa
resta che deo sincera e fidele.
Finis, custu cantu apo formadu,
si dae te non benzo riamadu
mi dasa colpu fieru e crudele.
Finis, custu cantu apo formadu,
pienu de sas bideas pius amenas.
Finis, custu cantu apo formadu,
si dae te non benzo riamadu
mi dasa colpu crudele e fieru;
non la lasses de goi in disisperu
cust’ anima invasa dae sas penas.
De sa venas su sambene versare
dia cherrer cuntentu pro ti amare!

(1927)