Mortu su attu, sos sorighes ischertiana
di Costantino Longu

Sende in custa domo dominande
su attu chi sos malos mortu l'ana,
fin sos sorighes frommos in sa tana
timian pro l'intender maulande.

Com'invece sun tot'ischertiande,
cantu fastizu e pena mi dana!
Ca tenen insaziabile sa gana
mi sun dogni provvista rosigande.

Sorighes, como totu ischertiade
ca est mortu su attu chi tenia
chi fit dotadu 'e rarabilidade;

ma su chi sento est una cosa ebbia,
chi attua gai, pro sa veridade,
non che nde torrat pis a domo mia.