Moda a Sant’ Antoni
di Costantino Longu

Oh Antoni ch’ in Coma ses naschidu
intr’ ‘e s’ annu dughentoschimbantunu
e in sa terra d’ Egittu preferisti
de passare sa vida in su desertu.

1

Tue penas immensas as suffertu
lassande sas delizias terrenas;
tue suffertu as immensas penas
sas delizias terrenas lassande;
solu in sa Tebaide pregande
dogni comodidade l’ as fuida.

Oh Antoni ch’ in Coma ses naschidu
intr’ ‘e s’ annu dughentoschimbantunu
e in sa terra d’ Egittu preferisti
in su desertu de passare sa vida.

2

Tentu as da’ genitores sa naschida
chi sas vias t’ an dadu ‘e salvamentu;
dae genitores sa naschida as tentu
chi ‘e salvamentu t’ an dadu sas vias;
e s’ edade de vint’ annos tenias
cando ennidos sunu a ti mancare.

Oh Antoni ch’ in Coma ses naschidu
intr’ ‘e s’ annu dughentoschimbantunu
e in sa terra d’ Egittu preferisti
in su desertu sa vida ‘e passare.

3

Tando totu t’ as bendidu pro dare
a sos poveros su bene ch’ as connotu;
tando bendidu t’ as pro dare totu
su bene ch’ as connotu a sos poveros;
e in sos solitarios ricoveros
lontanu da’ ognunu tue fuisti.

Oh Antoni ch’ in Coma ses naschidu
intr’ ‘e s’ annu dughentoschimbantunu
e de passare sa vida in su desertu
in sa terra d’ Egittu preferisti.

4

Sos abates d’ oriente fundaisti
in Eracrea da’ sa cristiana zente;
fundaisti sos abates d’ oriente
in Eracrea da’ sa zente cristiana;
sa santidade in te connotu ana
obbedian’ a dogni tou invitu.

Oh Antoni ch’ in Coma ses naschidu
intr’ ‘e s’ annu dughentoschimbantunu
e de passare sa vida in su desertu
preferisti in sa terra d’ Egittu.

5

Chilcadu as a Paulu Eremitu
chi fid’ in penitenzia assoladu;
a Paulu Eremitu as chilcadu
chi assoladu fid’ in penitenzia;
tando mandadu at sa provvidenzia
su pan’ intreu invece de una perra.

Oh Antoni ch’ in Coma ses naschidu
intr’ ‘e s’ annu dughentoschimbantunu
e de passare sa vida in su desertu
as preferidu d’ Egittu in sa terra.

6

Contr’ a sos cristianos aspra gherra
faghiat sa potenzia ‘e sos romanos;
aspra gherra contr’ a sos cristianos
sa potenzia ‘e sos romanos faghiat;
ma sa presenzia tua incoraggìat
sos martires ch’ innozzentes ruttos sunu.

De passare sa vida in su desertu
in sa terra d’ Egittu preferisti
oh Antoni ch’ in Coma ses naschidu
intr’ ‘e s’ annu dughentoschimbantunu.

7

Penitenzia, preghiera e digiunu
est bistada sa vida tua intera;
penitenzia, digiunu e preghiera
est bistada s’ intera vida tua;
ponias sos dimonios in fua
cun sa presenzia tua ormai santa.

De passare sa vida in su desertu
in sa terra d’ Egittu preferisti
oh Antoni ch’ in Coma ses naschidu
intr’ ‘e s’ ann’ unu e dughentoschimbanta.
8

D’ Ariu s’ eresia l’ as infranta
ca fit contrariu a Gesusu e Maria;
d’ Ariu l’ as infranta s’ eresia
c’ a Gesusu e Maria fit contrariu;
cun su podere istraordinariu
de s’ ateismu riprovadu as s’ ingannu.

In sa terra d’ Egittu preferisti
de passare sa vida in su desertu
oh Antoni ch’ in Coma ses naschidu
in dughentoschimbantunu annu.

9

Unu casteddu in su desertu mannu
a destra de su Nilu as iscobertu;
unu casteddu in su mannu desertu
as iscobertu de su Nilu a destra;
e pro alloggiu in sa zona silvestra
as derrutta un’ istanzia preferidu.

In sa terra d’ Egittu preferisti
de passare sa vida in su desertu
intr’ ‘e s’ annu dughentoschimbantunu
oh Antoni ch’ in Coma ses naschidu.

10

A Santu Paulu tue as sepellidu
e d’ Attanasiu ettadu li as su mantu;
as sepellidu tue a Paulu Santu
e d’ Attanasiu su mantu li as bettadu;
e-i sa losa sua as adornadu
tot’ ‘e fiores dae testa a pèse.

In sa terra d’ Egittu preferisti
de passare sa vida in su desertu
intr’ ‘e s’ annu dughentoschimbantunu
oh Antoni chi naschidu in Coma sese.

11

A pustis mortu in cussu tristu mese
da’ sa foresta ti ch’ ana regortu;
in cussu tristu mese a pustis mortu
ti ch’ an regortu dae sa foresta;
e pro totu sos seculos sa festa
ti faghede sa cresia de Roma.

In sa terra d’ Egittu preferisti
de passare sa vida in su desertu
intr’ ‘e s’ annu dughentoschimbantunu
oh Antoni chi ses naschidu in Coma.

Goi de la finire apo dezisu
custa moda cantada de improvvisu.

(Improvvisada in Silanus su 17/01/1930 poi de aer intesu sa preiga in sa missa)