Sa Funtana Solitaria
di Costantino Longu

In custu buscu pienu de friscura
nasco deo, cun lentu murmuriu,
ma nemmancu in sos meses de s’ istiu,
cando pius abbundat sa calura,

a s’ infriscar’ in me a-i cust’ altura
non che nde pigat de omine iu:
nessunu mi nd’ assazat un’ uttiu
pro chi sia lezera, frisca e pura.

Non che nd’ arrivat de laras sididas
pro lu chilcare in me su ristoru
consolende sa mente e-i su sinu;

sò sempre solitaria in cust’ oru,
ignorada m’ auno a su trainu
ch’ attraessat sas baddes fioridas.

====

Nasco dae sas lemas de una rocca
de sa pedra prus dura e pius bia;
sò limpida e frisca che biddia
chi falada in tempus de fiocca.

Ma non che ido manc’ una picciocca
cun s’ isposu piena ‘e galania,
pro nde buffare de cust’ abba mia
e pro si nde prenare calchi brocca.

Finas calchi pastore, chi che passat
a tuniu cantende fattu ‘e s’ ama
in sos beranos e in sos istios,

a s’ infunder sas laras non s’ abbassat,
de s’ abba mia non nde tenet brama
ca non connoschet sos meritos mios.