Cando sa morte
di Costantino Longu

Cando sa morte, pro me tantu cara,
at a sas dies mias fine postu,
chi mi bies cadavere cumpostu
in gioventude intro in sa bara,

in coro tuo in s'istante nara:
"Mortu est ca non l'apo currispostu!"
Già chi a mie de morrer as'impostu,
amara a chie cheres ti prepara.

Cando chi non pius sustas pupillas
cun dunu velu de malinconia
amore santu ti den implorare,

tue sas dies pius tranquillas,
cuntenta, pro chi deo mortu sia,
cun dun'ater'isposu des passare!

1929