A t'ammentas, Maria, cando fimis
in s’ edade ‘e sa menzus giovinesa,
cando, prenos de tanta cuntentesa,
in sos carrasegares ballaimis?

A tempus giustu chimbirinaimis,
dogni vena che fogu fit azzesa,
tando, chi arriverat sa ezzesa
mancu lontanamente bi creimis.

In sos inghirios de su ballu sardu
a man’ a pare cun tegus, Maria,
fia su pius giovanu gagliardu.

Como sò ezzu, privu d’ energia,
su samben, chi fit tando troppu cardu,
s’ est infrittadu chi paret biddia.

=======

Tue fisi una giovana galana,
islanciada, perfetta cale Dea!
Azzendias de amore sa idea
cun sa bellesa tua frisca e sana;

como ses una ezza zuffi cana,
prighizonada, iscolorida e fea,
solu cun su acchiddu adduras rea,
sos annos giogu malu fattu t’ ana!

Ue sun cuddas tuas brundas trizzas?
Ue sun cuddos ojos luminosos
chi pro me de Cupidu fini frizzas?

Custos annos pro nois sun penosos,
Maria, proite prus non ti addrizzas
cun cuddos movimentos flessuosos?