Zenias antigas
de Minnia Pani

Limpidos alenos de antighesa
Eredados da e babbos e fizos
Sardu antigu de sabios cunsizos
De bonas usantzias e fainas
Sun culturas antigas e divinas
Fascadas de orgogliu e nobilesa.

Sas coronas tessidas an lasssadu
Omines de cultura poderosos
De virtude, restados sun famosos
Sardos de gloria e de dolore
Aggiunghende lugor’ a su lugore
S’amment’ issoro nd’est valorizadu.

Sun sos sinnos ch’ iscurren che sos rios
De un’ era chi fit sa baronia
Cun sas cantones de sa tirannia
Isfruttadu nd’ hana sa memoria
Sardos ch’ appartenen’ a s’ istoria
Eredes de sos versos sun sos bios

Los cantan’ e affortin sas istigas
Che sepuscu de pasca attuddidu
Mantesu che siddadu fioridu
Sighende sa peutas cun amore
De puntos appostitzan su valore
Ingranidu che ranu intr ’e s’ ispiga.

Ranos ch’ attitat s’ avreschid’ atzesa
Cun batturinas cantos’ a tenores
In sos cuiles cantan sos pastores
Muttos e sonos lassana sas famas
E custos usos indeoran tramas
De sa cultura ch’est una ricchesa.

Sos suelzos, sa murta e sos lidones
Sunu alenos de friscos amigos
E sun profumos e nuscos antigos
De sos telarzos filonzos e fusos
T’ammentan sos costumes’ e sos usos
De berrittas cun ragas e bentones.

Ses de sabore antiga zenia
Fintza su faeddare t’est antigu
Che alzola a cuccuru de trigu
Cust’ est su sardu…. De sa terra mia.

MENZIONE /2004 / PREMIU LOGUDORO TEMA: “CHIE EST UNU SARDU?”