1
"De cale male l’atzes ingurpatu"
Su Console romanu dimannesi'
"In sa ruche incravàlu" risponnesi'
Est nanne "so 'Itzu 'e Deus imbiatu"
A Barabba pro Gesùsu iscappesi'
Pusti s’aère sas manos lavatu
Dinco l’hat fattu a Gèsu' fustigare
Cumannesi' Pilatu a l’incravare

2
A su Corpus sambenosu e offesu
L’incarchesin sa corona ispinosa
Chi punghennela sa conca de Gèsu'
Istillesi' pranghenne sambenosa
Chin sa Ruche a pala 'e tottu su pesu
Cominzesit cussa Via Dolorosa
Prinzipiesit tanno su caminare
Caricatu 'e peccatos de tratzare

3
Sos pecattos de s’umana tzenìa
Su Babbu Mannu Deus li carichesi'
Gesùsu indebilitu si corchesi'
Rughenne appesantitu in cussa Via
Su sambene a sa terra si miscresi'
Che dinco fustigatu prima via
S’anzone chi fit prontu a masellare
S’arrichesi' sichinne a istillare

4
S’ispada trapassesi' chin dolore
S’Immaculata dinco hat istu su Itzu
Su vrore innotzente candidu litzu
Sutta su pesus donzi peccatore
Sos occros de Maria in su fastitzu
Li torresin sa luche chin amore
Sa Madonna sichinne a lacrimare
De sa Ruche acumpazesi' s’annare

5
Cussu 'e Cirene Simone custrintu
Sa Ruche non la cheria' piccare
Sa Grassa 'e su Segnore l’hat cumbintu
Ca cussa fit s’ora 'e s’appietare
Cussa Ruche l’hat chin amore intintu
Su Discepulu 'e Cristos in s’amare
A su Golgota fit a ne l’arziare
Uve devia' Gesùsu ispirare

6
Veronica a Gèsu' lu cumpatesi'
Idennelu suffrinne in patimentu
S’accurziesit a Isse unu mamentu
Pro l’assuttare s’abba chi valesi'
E su sambene chi valia' lentu
Chin dolorosos gutzos lu bagnesi'
Cussu pannu chi postu a l’assuttare
Assutesi' su patitu gutzare

7
Rughesi' galu impotente Gesùsu
Ininnenche pistatu in cue sutta
Abbirgonzitu resteit a sa mutta
Beffatu dae sos prentes su prusu
Sa Ruche chi a supra ja ne l’est ruta
A s’ora non l’hat mortu ca dae susu
Deus lu cumannesit a s’arriccare
Ca initu non fit su sacrificare

8
Su Itzu precanne su Babbu lis nesi'
A sas eminas chi l’ini pranghenne
"Non mi pranghetas si bos so dolenne
Ma pranghite ca non bos cunvertesi'
Pro tottu vois ja mi so ispennenne
Pro chi sa volontate e Deus fattesi'
S’Anzone 'e Deus devites ascurtare
Si bos cherites oje purificàre"

9
Accurziannesi a s’assempru umanu
Torresit a rughes prus sufferente
Lu fattesi' pro cuss’umana zente
E pro lu sarvare donzi cristianu
Su precare est su solu ispediènte
Chi chere contipitzatu fitianu
"Sempes chin bois jeo appa a restare"
Lis naresi Gesùsu in s’appellare

10
In su Golgota l’istratzesin sa este
Lassanneli su Corpus innudatu
Supra sa Ruche sichi su maltrattu
Cravannelu a sa linna coment'este
A manos e pedes l’han incravatu
Chene ischirene cussu acher it'este
Sos craos chi sutucan sambenare
Sono che zudeos malos a domare

11
In su sichirene su cherrere 'e Deus
Innalzesin in Ruche s’Incarnatu
"Sarvannos" unu bannitu l’hat natu
A s’aterunu ch’hat connotu s’anneu
Li naresi' "sarvu ses c’has precatu
Oje chin mecus enis a s’Empìreu"
Cuss’anneu c’hat connotu in su precare
Lu sarvesit in pedes de s’Artare

12
Tottu est prontu pro torraret a Corte
S’iscurica' su chelu a mesudie
Pro tres oras vinas a orta 'e die
Gesùsu abannonatu est a sa sorte
Dinco arrivesit a sas tres sa morte
Su Babbu lu collesit a inie
A s’urtimu alènu 'e su Passionàre
S’Ispiritu Santu lassat annare

13
Prenatu de dolorosa angustìa
Zoseppe D’Arimatea in caritate
Essenne s’ora 'e s’eterna pietate
Donesi' su Itzu a sa Mama Maria
Sa Madonna 'e tottu s’umanitate
Pranghesit su Sarvatore Messia
In pedes 'e sa Ruche s’abratzare
Lu cunfirma' de Maria su dare

14
L’imbolichesin in dunu letzolu
Su Corpus 'e Gesùsu martoriatu
Precannelu e pranghennelu chin dolu
Lu lassein in sa tumba sepultatu
A sas tres dies a bita est torratu
Inghennelu cuss’iscuru interratu
Nos hat cherfitu a Pasca perdonare
Sa Santa Trinitate su peccare.