Vardettas
de Tonino Fancello

Ite pessas...
tocande sa corona
e irgranas
sos rosarios d’una jana...
femmina dolorosa
‘e sa Barbagia,
chi estis
chin sa brusa murriniedda,
ses mamma d’una faida
remittana...
e frastimas sa luna beffulana
pintada che una mascara niedda.

Sas campanas prus mudas in s’aera
so-e intendende
sonande a toccu lentu...
e custu tempus pranghet risuluttu
sa pena‘e custos fizos in su luttu
chin lacrimas de sale e d’amargura.
e fringhen’in cust’era prus madura.

A ue tempus...ses currende solu…
Sos fizos son che feras in sa notte
son pentumas arestes de sentidos,
e preides in sa rughes son chistidos
in caminos de groria a dolu chintu,
de samben sos trainos an’intintu
in’inpuddiles nieddos de sa sorte.
chin un’urtima...missa...estia‘e morte.

In pittu...
de sa brasa allutta in foghu
ballande son sos coros in disterru
troppu lunas mustrencas d’un’ifferru
illampizan sos chelos de Barbagia,
ma una lughe in su sinu bisonzosu
e unu frore‘e perdonu irmentigadu
in sa janna e sa dommo‘e su creadu
cheret ponne su... Deu... isperanzosu.

E in s’iscuru...
una framma… èst una chera…
unu cantigu areste d’un’istria...
e una...mamma...in brenucos…d’un’ispera.

2-Classificato premio Montanaru 2007