No nd’isco si s’aembru tou, dolu
ti siat o bolàntiga gosura
cando a sa pinna pones manu e solu

intro sa notte pìdiga che tura
nos cumbidas, cun càntigos a bolu,
de custu mundu, ràngulu e durcura.

E tra rennegos, pore e bellas galas,
lompes a camineras de isteddos
inue, disserrende mannas alas,

boddis ranos de astros minudeddos
e rodiende a lenu a lenu falas
a los mudare in lùghidos faeddos.

No nd’isco si de veras est ‘asie
su nàschere galanu ‘e sa maja
chi frorit dae te tra notte e die,

ma isco cantu dat sa poesia
tua a s’ànimu nìbidu de chie
siat bonu a nde sùmer’ s’armonia.

E un ammaju isco de bisuras
chi disvelat de te s’umanidade
manna in bogare dae amarguras

e gosos, giara, cussa veridade
ch’a frades tuos, ànimas iscuras,
apparitzas cun ànimu de frade.

Isco comente, dìligu e lizeru,
s’estru de sas paràulas chi rimas,
de s’esistere isvelat su misteru

ch’intrinat de se pèntumas e chimas
gos’ ‘eranile e frittu disisperu,
sas ultimas fainas e sas primas.

S’alenu ‘e s’arte tua at donare
su mezus benidore a sas aèras
de custa limba e custu poetare

tou, ledre che milli sonazeras,
intro su coro nos at a sonare
cun unu repiccare ‘e galaveras.

E galu as iscriere cantones
noas, bonas a gìghere, che frinas,
sa mùida de noas istajones

cand’in nottes alluttas dae grinas,
a cale siat astru las intones,
nos ant a bènner’ durches che istrinas.

I° prèmiu setzione poesia in rima in sa de XXX editziones de su prémiu de poesia "Antoni Andria Cucca" Ossi, 22 de abrile 2017