Unu, duos e tres...
di Salvatore Pintore

_______Unu, duos e tres...
cominzat su contu de sos annos
semenes in surcos de incantos
ch’isettan s’abba de ojos innamorados
suore e sambene de omines tribulados.
‘Asi donzi istajone lu faghet mannu
e in beranu pius bellu cantat
su meraculu.
_______...vinti, vintisette, trinta,...
Narat s’orolozu a sas orijas de sa die.
Passan che lampos sas mezus ‘ideas
chi aberzende s’anima de s’aera
paren raighinas de arvures lughentes
benas de unu pensamentu chi tottu guvernat
chena ischire ite nos accuntentat!
_______...barantunu, sessantaduos, settanta,...
It’est custu contare sos passos de su coro
sa presse cando chircat de pigare a chelu
o cando lu chirriat su ‘entu de s’amore
che foza e unda in mare?
_______Sos numeros sun un’aggiudu
ancora unu segretu de maìa
sinnos pro leggere sa materia
ma non s’ispiritu de sa vida.
______S’aritmetica de s’esistenzia
no est fazile a imparare
in s’iscola de su mundu
in s’ Isola de antigos runaghes.