Onzi 'olta chi tanco
ojos pro drommire
mi sonnio in Sardigna, in bidda mia.
Annos meda bi manco,
non poto resessire
a istudare tanta nostalgia.
Cun pius importantzia
sos annos de s'infantzia
ch'in su giogu innotzente abbile fia
e de onzi dimora
sos abitantes los ammento ancora!

Sambenadu e numene
de fizos, babbu e mama
e tottu, su carattere chi haian:
usantzias e costumene,
caddos, boes e bama
e canes chi cun nois giogaian.
Tempos bellos abberu
de su risu sintzeru...
Ande, si cussos tempos torraian!...
Giudichende in me
bi torraia puru a brincare a pè!

Nde so meda lontanu
e b'est su mare in mesu.
Mi diat parrer accurtzu e asciuttu,
mancu su pilu canu
mi diat dare pesu.
Torraia pitzinnu de assolutu,
allegru che crabolu
isterria su 'olu
cantende che simmai calchi muttu.
Si de sorte so fizu
ispero 'e m'appagare su disizu!