Un'ojada a Magumadas
di Vittorio Falchi

a s'amigu Gigi Piu cun istima profunda

I

Mai mi pensaia chi Magumadas,
una 'idda de pagos abitantes,
haeret tentu cosas importantes
meressidoras d'esser visitadas.

Che in ateros tempos sas armadas
de romanos e pùnicos birbantes
sas costas suas e sas cunfinantes
las han a ferru e fogu devastadas.

Oe s'itinerariu de su 'inu
ei sas baddes tra Modolo e Turas
la 'estin de bellesa, paghe e fama.

Ma no bastat s'amenu panorama
a nde torrare mancu in bonas uras
sos ch'han leadu un'ateru caminu.


II

Oe sos disterrados no che torran
a populare costas e marinas,
aterue han postu raighinas
ue filos d'affettu los accorran.

Sos penseris lis triulan e forran
sos cherveddos cun bramas malandrinas
e lis forrojan coro e istintinas
che beccos chi si tzumban e s'iscorran.

Cun su tempus s'alteran sos disizos
in duas perras aberin sos coros
e los faghen suffrire e sambenare.

E si puru han gana de torrare
fora los ligan pius fortes loros
ca pius de su logu aman sos fizos.

19 de bennarzu 2010