Tottu Passat
di Giovanna Maria Lai Dettori

Su battile de sos sonnios est pesosu istasero.
In su lampalughe ‘e s’occasu
tinnit su ballu tundu de sos disizos,
ispassizende bramas de cras
in sos aschiles de un’isteddu andantanu,
attitadore de ammentos,
illattados in su faeddu de unu mudine neale.
In s’ancuju de un orizonte allizadu
mujolos de paliacciu
sun colende randine alluttu
in sas coeddas de unu entu
apojadu in soles de lentore.
E deo, aggabbadora de isperas,
ite ateru pedo a su chelu
si no miradas de veridade,
in s’ispiju de una lagrima macca,
caratzada de crèentzia.
Luna, frischinida ‘e majia
in su bonette de unu majarzu iscontriadu,
promittimi isterrimentas de pasu,
in sa cabitta de unu gosu mai nadu.
Riet una nue iscassiada,
e fuliendeche su arriu
de pregadorias fittianas,
già sizillat sa ventana ‘e s’aera.
E tottu passat,
in s’iscurrizare de unu tempus dissentidu
chi m’isfoettat a sa essida.

No!

No mi lassedas andare…
No como..

TRADUZIONE - Il basto dei sogni mi pesa stasera. Nel chiaroscuro del tramonto danzano i desideri, trainando brame del domani sulle anche di una stella giròvaga, prefica di ricordi stoppati sulla voce di un silenzio costante. Sul limitare di un orizzonte appassito, mani di pagliaccio stillano grandine infuocato sulle falde del vento, stagnante nel grembo di un sole gelido. Ed io, giustiziera di speranze, che cosa altro chiedo al cielo se non occhiate di assenso, nello specchio di una lacrima stolta, mascherata di credulità. Luna, porzione di magia nel cilindro di un mago dissennato, promettimi giacigli di quiete sul capezzale di una gioia mai nata. Sghignazza una nube impazzita, liberando il carico di preghiere giornaliere. E tutto passa, nella frenesia di un tempo forsennato che mi sospinge verso l’eterno. No! Non lasciatemi andare…. Non ora.