Est tempus chi comintzat su lentore
e sunt galu caentes sas seradas,
sas dies ana sas oras allestradas
e lassant dulche s’ umidu alidore.

Torrant a toccheddare antigas fadas,
tempos ch’ appo connotu dae minore
cando sa ‘oghe de unu cantadore
mi faghiat pianghere debbadas.

Torrat s’ammentu, s’antigu sapore,
de mama in sa brassitta affainada,
cantende muttu a puntu de tenore,

e sa figura ‘e babbu in sa pigada
cando tribagliaiat de minadore,
in groppa a sa balilla impruerada.

Hapidanne de su 2005