TORRADENDELOS BIOS!

Torradendèlos bios
da sa cussolz’anzena,
chi no paten prus pena
sos de domo.

Torradendèlos como
chi no tenzan traschia:
lutos in Nassiriya
den bastare.

Fun cuntentos de andare
po sa pagh’e sa terra,
ma sa paghe cun gherra
si conchistat.

Deus chi bos assistat
in su ‘ostru distinu,
cun s’azudu divinu
caminade.

Bios nde los torrade!
In ammentos de importu!
No in cassias de mortu
tricolores!

Medagliones e frores
serbin a paga cosa,
unu ‘asu a s’isposa
dat cunsolu.

Semper in oriolu
chi si muntenzan sanos
altziande sas manos
a sos chelos.

Bios torradendèlos!
Po atzender lugores,
colorare de amores
sas fiamas.

Po su gosu ‘e sas mamas,
po su gosu ‘e sos fizos,
po chi torren sos chizos
colorios…

Torradendèlos bios!

Antoni Piras