Ti pesso
de Istèvene Flore

Si ti pesso
mi pesso acurtzu a tie
e pesséndedi pesso
si tue puru ses pessende a mie.

A bortas ti pesso
solu
pro su gustu ’e ti pessare
ca paret custu fatet bene a su coro
e ti pesso bella
cando ses risulana
cun miradas de lughe in ogros tuos
chi allumant sa vida a sa diada.

Ti pesso ritza
sètzida o corcada
in cale si siat modu o siat manera.
Ti pesso che istajone
dispensera chi ammadurat
sos frutos de s’amore
pro dare durcuras de sabores
e cumprire sas ganas de s’annada.


Ti pesso bella
finas aumbrada.
Si moves lara cando ses pessosa
e ti pesso
che femina diciosa a s’anda e torra
sempr’afainada
cun sas rughitas tuas incarcadas
chi ti mudant de chiza in su momentu.

Ti pesso estida
e ti pesso ispozada
dae sa manu lèbia de su tempus
frimmadu in s’incantu chi mi passas
jaru che-i sa luna levantina
cando in s’andare carignat sas umbras
durches in note ispessamentada.