Terza poesia

Apustis de s'iscritta e sa cantada,
bellas in d'onzi sonu e fantasia,
un'atera bi nd'at de poesia
prus importante e de mancu connotta;
e chie, in fide, at s'anima devota
la jughet intro 'e su coro allozada.

L'est de incantu a su chi la manizat
cando cun sacrifitziu e amore
ponet sa manu subra 'e su dolore
a illebiare in cada sofferentzia,
tando, dae s'intragna 'e sa cussentzia
li riet e che fiore si l'abizat!

No bi at unu palcu a la cantare
menzus de s'ispidale o lettu 'e pena
de chie, marturiadu in sa carena,
in gherra pro sa vida inìe isettat,
e cun s'alenu sou li chiettat
su pattire a licantzu sonniare.

Ue sa lebbra istuvucat piaes
b'est in s'aèra, a indurchire su situ,
in nuscos de azudu beneitu
cun manu chi de caridade bundat
e puntas de dolore bi arretundat
artziende morale in penas graes.

O cando in solitudine 'e presone
s'anima est trista, chirchende cunfortu,
ca sepultadu e chena essere mortu
s'omine annegat in su disisperu,
e l'est amiga in abbrazzu sinzeru
intonendeli 'e paghe una cantone.

Cantone chi s'ischidat dae su coro
in sa poesia si b'est bia e brillat
e cun sa terza Musa li birbillat
sa paraulas prenas de bellesa
pro versos raros, ch'in delicadesa,
si atzendat s'amore in lughes d'oro.

Sa prus bella est de cantigos umanos
istrinada in fioccu 'e cumpanzia,
pro dare a chie suffrit s'allegria
e, a chie li mancat, s'isperantzia
in su quadru 'e reale sustantzia
pintad'a cua 'e toccheddos de manos.

Cando s'urtimu vagone s'istaccat
dae su trenu iscussertu 'e sa vida,
ca l'at sa cursa umana gia finida
e de cudd'ala intzertu est su viazu,
tando est issa ch'in lughe dàt corazu
e s'iscurigore 'e su dubbiu ispaccat.

Giovanni Frassu (Ottana)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!