Terra mia
Salvatore Pintore

Sas laras de su tempus
no ischint comente ti giamare
o mama pro sos annos sutzados
a su sinu de s’ispantu
o sorre pro onzi die de sole.

Ancora dae una femina naschet sa ‘oghe
e sua est sa manu chi carignat su primu piantu
sos sonnios in cara a sa luna
su primu latte de sa vida noa.

Malciu est su semene chi t’ingraidat sos fiores
s’aradu amorosu chi ti surcat sa carena
preparat onz’ istajone su laòre
e in sas làcanas de s’anima
su punzu sou murghet sos pensamentos
pro giagare su chejveddu de sa zenia umana.

Una ojada de cumpassione
nos mantenet àrbitros e liberos
ispraminados in s’arzola de su mundu
comente semenes de lughe
biandantes in biddas de amarguras
chi tottu ana de antigu e de nou
sonos e cantos artes e sabores…

Medas frades ti lassant sola
in mesu a su mare de sa modernidade
e cun su piantu frimmu in bula
s’iccandant atterue a t’irmentigare.
Disterrados parent fizos de Niunu
dae unu portu a s’ateru veli-veli
gherrende cun issoro matessi
o cun su presente malefadadu.

Dae mare a mare acciappant ispundas
ch’in rios de sambene faghent lorumare
ammentos de onzi faina e poesia
de die in die pedende asos
finas a s’ultima isterrida de limba tua
semenada de peraulas d’oro e ‘oghes bias
un’odissea de rimas noas...