Teresa Mama de coragiu
de Domenico Angelo Fadda

Po blandare su dolore
fat’as donu de isteddos
in isperas a piseddos
chentza nde chircar’onore.


Una terra, s’Albanìa,
fiza ‘e Deus t’at pesadu
giovanedd’as caminadu
chena babbu, chena ghia
cun su coràgiu ebbia
siddadu as fat’’e s’amore
cun fide a su Segnore
leadu as vocatziòne
in d-un atera natziòne
po blandare su dolore.

De Gesus fisti s’isposa
e fat’in vida l’as votu,
fizos trumas nd’as connotu,
Teresa, sempr’amorosa
che una Mama diciòsa
in terra de iscameddos
a nudos chena soneddos
in chirch’e paza e ranos
cun tuas umiles manos
fat’as donu de isteddos.

Sorres medas t’an sighidu
in disterru de lamentos
como istranzos sunt cuntentos
ca pan’e binu ant retzidu
afligidos chena nidu
mancu tunciòs ne faeddos
bidian chelos nieddos
ca chen’alas fin ‘olende
com’a s’Indià las sunt dende
in isperas a piseddos.

Cantas dudas tue puru
as proadu, a sa cua,
non parias fiza Sua,
tra tie e Isse unu muru
e b’idias sol’iscuru,
ma regolt’as su fiore
in piàntu in su lentore
fentomadu da niunu
e Santa t’an fat’in d-unu
chentza nde chircar’onore.

2° Premio- Setzione: Gigi Sotgia Poesia Religiosa Premio Logudoro OZIERI 2012