Temporada
di Mario Nurchis

S’instrampan in sa turre
undas tzacheddosas e fritas
chi afrancan sa roca pianghende
e nde catzan sa neula
chi si fit imbogiada
in su marralzu
in s’oru ‘e su mare alloroscadu.

Muidat su padente fruscinosu
e campingios lenos nde falan
de bonacumandu
cando cheret su bulione airosu
chi atòchiat che margiatzu
cannujende e seghende
sas naes isprammadas.

Su ‘entu urulat in tzitade
in son istrintorzos desertos
e in sas domos istancadas
e frusciat cantones disisperadas
inter sos chizones
irrainende teulas
e su chi debbile agatat
pesende fiotos de piubere
chi s’abbatit a fortza
in sos bidros trèmidos.

E deo inoghe so allegru che batu
pro su caldu e su cuerru
e mi ponzo a giogare
cun su lorumeddu
de pensamentos recuidos.
Achico risitende su fogu
chi irrusciat chinchiddas
de tebiore e de paghe.