TEBIORES DE ISPERA

Undas birdes de laore
galu apo atraessadu
e pabailes birgonzosos
pro assender a custas abas craras
in sa festa turmentada de fiores.

A passos mudos
traschias apampadas de asseliu
apo rugadu
messende sos ultimos mannugros
de su die, assustadu
dae sa muida 'e su sole.

Ite andare gaddinosu de lugores!

Torrant galu a pizu sos tebiores
carignos e umbras
de unu 'eranu chi no mujat
in su manizu abolotadu
de colores.

Zenia de ispera macca…

Sos bisos sunt calighes de muru
afaca a sas crejuras
'innidas e arestes.
Aparados a s'incunza
de gutzos de lentore
abrandant sa brama ola ola
de lagrimas noitolas.

Pessamentos banduleris...
Mantzas.

Finas tue t'ispantas,
istimada frina lebia,
cuntinu, cando torras tramunada
e che carras
carchi ateru sabore
currende in chentu andeos.

Fitianu isvanessis
chen'alenu,
che sos lanzos didos meos,
mai sustentos,
intro sos pilos canos de s'istiu.

Ma semper benis a oros de su riu
in sa terema prus arta de s'ispera
amantiosa de pessos fidados
a isorver sa jaga de su travigu.

Est tando chi astringo
sos loros a sos sonnios
e a redinagos lenos
truvo caddos de uda
trazadu dae su navigu
innantis
de su gosu 'e sa rejone.

Antonimaria Pala
2004