Su sonu ‘e su tempus

Cando sa mente si leada sas fuas,
andande ilbeli-ilbeli a s’iserada,
passande in serattu e in puas
sos ammentos de sa fida colada.
Sa pitzinnia cun sas gioias suas.
Sonos ‘e muidas d’epoca passada.

Su cantu de su puddu a s’impuddile,
su passu de su caddu ferradu,
tintinnos de incudine in fraile,
su tzirriu ‘e su carru in s’impedradu,
Su chistionu de zente pastorile
cun passu ‘e buttinu imbullittadu.

Toccos de malteddu dat su cattolaju,
colpos de telalzu dat sa tessidora.
Su cantu attonadu de su ramenaju
cun lirica suave e incantadora.
Su cantu ruzzu de su calbonaju
cun boghe lastimosa e bandidora.

Su versu druche de sa serenada
chi si soliat fitianu pesare
in sa carrela, in sa contonada,
da parte de isposu pro incantare,
che rusignolu, sa sua innamorada
pro fagher nidu nou unid’appare.

E como, o fizzu meu, cale sonu
Ti accumpazat cust’era benidora?
De sa televisione su chistionu,
o sa pubblizidade prus ancora?
O sos aereos fusidos che tronu
Chi sulcana s’aera a dogni ora?

Giovanni Michele Migali