Su pipiriolu
di Vittorio Pinna

Pipiriolu de canna
appentu de pizzinnos
cumpanzu de crabarzeddos
solos solos
in costeras immensas.
Sos fruscios tuos
faghen trimire de malinconia
sos raros ozastros creschidos
in sos roccarzos de sa costa.
Ite accordos cheres fagher bessire
dae sos tres bucchittos tuos?
Oh, ti poteran sulare
sas laras de Beethoven
pro ammajare s’’adde
dormida a su muer de s’abe,
a su frusciu de merulas
in sas mattas de rù
a lados de su riu,
a sa ciarra de chigulas
isteuladas.
Pipiriolu de canna
appentu de su crabarzeddu
chi andat trambucca trambucca
cun sa conca in sas nues
infattu a su frusciu tou
e de calchi fiadu chi fuet,
mattulu de lana bianca
lezera, ‘olante
in sas roccas rujas.
Ti cuntentas de esser melodia
chi addulchit su surdu
iscampanare
de sas bezzas sonazas.

22 de cabidanni 1979