Prus de s’oro est su samben pretziosu
e non lu podes bender ne comprare
ma cun amore lu deves donare
a calecunu chi est bisonzosu.

No importat sa ratza o su colore,
chi unu amigu siada o parente,
siat culpèvole o puru innotzente
semper lu consideras cun amore.

Su valore de sa donazione
mai lu podes tue mesurare
ca una vida si podet salvare
cando li faghen sa trasfusione.

E bastat solu a dedicare un’ora
non ti causada ispesa ne dolore
este unu gestu chi no at valore
chie est morzende at a viver ancora.

Amigu avisinu de Atzara