Su ballu ‘e sos sentidos
di Gian Gavino Vasco

Nàschidu in mes' 'e lagrimas, pranghinde
po aer cussu nìu abbandonadu,
cussu primu alimentu apo chircadu
in cussu sinu chi m'aparteniat.
su mundu ancora in bratzos mi giughiat
e deo fio amore già pedinde.

Dolore e gosu in presse apo connottu,
chi mi nd'an ischidadu sos sentidos;
los at su coro intesos, los at bidos
inghiriendechelu a ballu tundu;
bintrados li che sun in su profundu,
cumpanzos de sa vida mia etotu.

E cussu ballu sighin dae tando,
cernente in-d' unu giogu, e cun sa mente
cun issos sufro su chi m'est dolente,
e cando mi dan gosu so cuntentu;
ma su chi pius caru m' apo tentu
est s' Amore e cun isse paris ando.

E mi lu tenzo istrintu in sos caminos,
a manu tenta, a bortas non si ch' andet,
o calch' àteri attesu che lu mandet,
leàndesi su logu in coro meu;
ca ballende b' est fintzas su prus feu,
chi mere est de sos coros prus meschinos.

Iscuru chie, bòberu 'e sentidos,
sos menzus non connoschet, ne at bidu;
ma peus istat cussu chi bessidu
eh' est fora da-e issos tottugantos,
chi chena neghe, tottus sos ispantos
de cussu giogu bidu at isvanidos.

Chie de' cussos bonos est amigu,
cun sa bèrtula a coddu, est semenande,
ube sa terra nuda est dimandande
briones de amore e amistade,
pò chi donzunu connoscat che frade
chie cumparet como che nemigu.

E tue, coro meu, non ti chensas
de cando troppu lestru in petrus andas,
cando a sa mente insegus mi che mandas
cussas emotziones chen'appìu.
Fintzas chi podes, sighi, ca so ìu;
ca si t'istraccas ... de giogare sensas.

Menzione d’onore nella sezione rima a tema imposto del “Premio Logudoro 2008 di Ozieri”