Sona chiterra
di Giovanni Pira

O chitarra sona sona
Chin suave melodia.
Pro s'innamorada mia
Sa reina de sa zona.

Sona chiterra fadada
tocca sas cordas de oro,
ca sa chi tenz'in su coro
isetat sa serenada.
Est a orijas parada
chin su coro totu fogu.
Sa prus bella 'e Meilogu
De Logudor' e d'Anglona.

Chin suave...
O chiterra ...

Sona chiterra dechida
armonios'e lizera,
ca in totu sa carrera
como sa zente 'est dormida.
Solu columb'est ischida
ascurtende cust'incantu.
Custu sonu, custu cantu,
sa ogh'e sa poesia

Chin suave...
O chitarra ...

Sona chitarra galana
Accumpanzam’ un'azigu
ca in traju sardu antigu,
suplicamos a fulana,
de aberrer sa ventana
ca de che la ider bramo.
Pro li narrer, sa chi amo:
issa est! E iss'ebbia!

Chin suave...
O chiterra ...

Sona durche, lena, lena
non tenzas duda peruna.
Como chi tunda sa luna
brillad'in chelu piena.
Est una notte serena,
sos astros sun in favore.
A glorias de s'amore
notas liricas intòna!

Chin suave melodia
O chiterra sona, sona.

Menzione speciale al Premio Letterario “Gurulis Ventus” agosto 2010