So' trazande
di Antonio Pira

Unu pensamentu a sos chentenarios! In Iscanu puru nd'amos tentu e nde tenimos:
tia Pepedda est andande a sos 105 e tia Nannedda a sos 106 annos!

So’ trazande sas carres consumìdas
in tribbulias, suores e peleas.

Bellas incunzas e annadas feas
nd’apo connotu, bidas e lassadas,
incunzas bellas e feas annadas
chi m’an afortigadu sos colores.

So’ trazande sas carres consumìdas
in tribbulias, peleas e suores.

Bundantzias, sicagnas, assutores,
zente onesta e malas intragnas,
assutores, bundantzias, sicagnas
cun fogheras, caluras e titias.

So’ trazande sas carres consumìdas
in peleas, suores, tribbulias.

Oras de gosu, dolos e traschias,
mamentos de tribagliu e de reposu,
dolos, traschias e oras de gosu
apo lassadu a banda e dispedidas.

In tribbulias, suores e peleas
so’ trazande sas carres consumìdas.

Como conto sos meses e sas chidas,
dies e oras, minutos afronto,
como sos meses e sas chidas conto:
su tempus meu nande m’est “Ajò”.

In tribbulias, suores e peleas
trazande sas consumìdas carres so’.

A cust’edade imbàtidu, però
semper a conca alta, in onestade,
imbàtidu, però, a cust’edade:
‘asi tue puru chi ses comintzande!

In tribbulias, suores e peleas
sas consumìdas carres so’ trazande.

Criatura chi ancora ses bintrande
a sa vida, l’afrontes in bonora,
criatura chi ses bintrande ancora…
mezus la bives si bene l’impreas!

So’ trazande sas carres consumìdas
in tribbulias, suores e peleas!