So fertu a ocru malu istanote (A sa pache)
di Giovanni Piga

Che pistichinzu ‘e frama
in su respiru fertu ‘e una traschia
so’ sichinde sa sémida ‘e sa Festa
chi si m’est imberghende
dae sos corbarjos de su coro meu
de timòria fozios.

Non bi cherjo abbarrare
arrematau
in istojas de bentu
graminande arrebbentu
‘e dies sortas
chin sos pessos allinzos
che ispicas chene granu suzonadas...

M’atrempo, a man’in muru
chin sa note in butzaca,
chircande alenu ‘e cras...
in sa trempa lunàdica ‘e sa mente,
a passu fadicau
chin travas de arcanos tropediu...

So fertu a ocru malu istanote...

M’est che tronu in sa pala
unu pessu ‘e luna ‘e golostri
dae s’àrbore ‘e sa note iscarbiau...

Bertuleri ‘e sònnios
bàtile de intrìghinos sufertos:
un’iscuta mi sedo
in su liminàriu ‘e sos chizos tuos,
che cane suta-mesa a acapidare
farfaruzas de Luche
rutas dae sa tibaza
de sas pupias tuas d’impuddile.

In s’iforru ‘e sa note
ti ch’intendo ballande
a boche ‘e ballu
e toroju de tonca...

A mi l’aperis s’àghidu ‘e sa Festa?...
Cherjo bisare galu
un’istripitu ‘e sole
pro sos fizos de cras
innantis chi m’ischide... a s’àter’ala...

1° Premio Poesia in versi sciolti al Biennale di Poesia in Lingua Sarda “A pes de Santu Padre” di Bortigali - 2009