Sinzu 'e poesias
de Angelo Maria Ardu

Cun su chi tenzo a tie mi presento
ch'est un'umile sinzu 'e poesias;
benin lizeras comente sisias
a las tratenner po pagu m'apento.

No l'isco si t'ammagio e ti cuntento
ca ignoro sas bramas chi tenias,
ma bi provo cun custas rimas mias
ch'innoghe a una una las assento.

Si de leger passentzia nde tenes
agatas allegria e amargura,
cundimentos chi pienan sa vida.

Una a s'atera semper est cosida
manc'una cosa t'abarrat sigura,
ma tue in coro sas bellas mantenes.