| Ses Tue Sardigna de Salvatore Sini |
 |
| Ses tue Sardigna
male e bene meu chi che fada mi nd’’enis ammajendemi, mi leas in sos bratzos e mi naras: “ ajo a sos logos de sa memoria, ad ammentare mamentos durches, a ti fagher’ ninniare in consolu in cussos laccos mai ismentigados, a bentulare sos chizos tuos istraccos, a ti pasare a s’umbra ‘e sos suerzos e a t’mberghere in sas abbas cristallinas. A currer’ ancora in cussas tancas fioridas e in sos padros indeorados da-e s’estiu” E ancora mi turmentas e mi cumbidas gasi, faeddendemi a s’iscuja. ” No t’ammentas cando in su seberanu silentziu mirende sas mudas pedras de sos montes chentza tempus ti frimmaias cun sa mente assustada a cuntemplare severas isculturas chi omines parian’ cun berritas e caras arvudas e solennes? E cussas frommas de antigas mamas cun sa mantiglia niedda, cuguddadas chi preghende parian’ a sos mortos mai nados?” ‘Eo miseru ti prego, cara e istimada terra, no mi ‘enzas piedosa cun triste nostalgia a turmentare sa trizile mente isconsolada. Lassami in paghe a sighire a imbetzare in custu anzenu logu chi ad amare no resesso. Pro ite ancora mi da pattimentu e dechida mi trajinas peri sos caminos birdes de sa mente inue fozudas e pedrosas chijuras intritzadas cun filu ferru ispinos, mi tenen frimmu, cun su piantu in su coro. |
|
