Cantu in re – Sa cantone de s'innamoradu isconcadu.

Ses pensende a sa pitzinna

di Benito Saba (2007)

Ses pensende a sa pitzinna,
deris sero l'as basada...
tue as s'anima abbengada,
bantzigada a ninna ninna!

E boddende cariasa
nde ses ruttu da' sa nae
in su puttu che una giae
in terra sicca e romasa...

E sa conca tua est rasa,
paret traste lutzighente,
gai iscòbiat sa mente...
e la giaman isconcada!

Ses pensende a sa pitzinna,
deris sero l'as basada!
... ...

E tzappende in binzas mias
t'as iscuttu a pe' sa marra,
pro sa dólima sa barra
tzaccare in bula cherias...

Ma sas suas galanias
ch'an bogadu s'amargura
a s'ammentu 'e s'ermosura
de sa cara dilicada!

Ses pensende a sa pitzinna,
deris sero l'as basada!
... ...

E cantende serenada
a sas ùndighi de notte,
cantadore conchebotte,
s'aera si nd'est falada!...

In sa crispa temporada
una lughe s'est atzesa,
una 'oghe s'est intesa...
sa chiterra est cancarada!...

Ses pensende a sa pitzinna,
deris sero l'as basada!
... ...

E cust'abba como est fritta,
ma ti 'ettan cosa 'uddente!
Su cherveddu l'as caente,
ti nde 'ogas sa berritta...

E sa prenda beneitta
accerada a su balcone
pro su 'asu 'e passione
sa pastera... l'at lampada!...

Ses pensende a sa pitzinna,
deris sero l'as basada...
... tue as s'anima abbengada,
bantzigada a ninna ninna!

Benito Saba

Questa poesia ha conseguito la Menzione d'onore al "Premiu Patada de Literadura Sarda" – IX Ediz. 2007