Ses che pensamentu
de Antonio Sannia

In altu cherzo 'olare,
subra 'e su firmamentu,
cun custu coro tristu e pedidore;
ube poder lassare,
sa bellesa e s' ammentu,
de su chi fit sentidu e fit calore.
In mesu 'e sos isteddos,
lasso ispera e faeddos,
a sa luna ch'at perdidu lugore.
Finas in s'arcu 'e chelu,
de s'amore non b'at perunu anelu.

O che l'imbolo in mare,
custu coro feridu,
po chi sas undas lu potan trazare;
non podet prus amare,
ca non tenet sentidu,
in cussas abbas che l'apo a lassare,
paris cun su dolore,
c'at segnadu s'ardore,
d'affettu chi no poto ismentigare.
Est coro impoberidu
de ch' 'ettare in su mare 'e s'infinidu.

E su nomene tou,
no mi cherzo ammentare,
ca ses che pensamentu intro 'e su coro;
e isprender su nou,
ch'at cherfidu ligare,
tramas de seda cun filos de oro
E tottu sos carignos,
chi d'amore fin signos,
tia cherrer torrare, cun decoro,
a sas intragnas tuas,
e si cheres in coro ti los cuas.

Su tempus ch'est coladu,
lassande su mudore,
in sa brama, in su pettus, in su sinu;
su frittu est adduradu,
ch'at bogadu s'amore,
e postu ispinas in custu caminu.
Si petalos de rosa,
bolos de mariposa,
tramas sintzeras, de seda e de linu,
preneran sas aeras,
d'amore an a torrare sas isperas.

Est notte nida, giara,
brillantes sas istellas,
e s'archu 'e chelu lughidu issu puru;
sa luna nos dat cara,
in mare undas che perlas,
che catzan su chi deris fit iscuru:
Ti prego, torra insegus,
ca mi ch'ando cun tegus,
chi domamos su tempus so siguru.
E de seda sas tramas,
ordimos torra paris......si mi amas.

Menzione speciale VI edizione Premio di Poesia Sarda "Istillas de lentore" - Ulassai 2012