Santandria
di Vittorio Falchi

Sero de abba muda e lenta
pioet in sas fozas grogas
de sa ‘inza ‘innennada,
in sas ultimas bolantigas
iscaluzas de agrazzu.
Pioet in sas naes nudas
de sa figu
ispramminada,
ischeletrida.
Curret s’abba in trainos.
Cun sa terra chi trazat
cun sas fozas lezeras chi si pijat
si che leat sas bideas mias,
sos penseris affundados
in su tempus.
In su tempus chi est
e chi no est.
Los faghet traessare
sutta mattas de rù
totu ispinas
a costazos de s’ulumu rutu
cun su truncu iscorzadu
fattu a cau.
Astriadas aguzas
mi pioen in coro
e mi prenden sa ‘ula
che mossu de melaghidonza
mala a ingùllere.

12 de triulas 1979